Al lojeiz e Breizh

Kavout un ti da feurmiñ war an aod, prenañ un ti lec’h ma vezer o labourat, kenlojañ, n’eo ket traoù anat e Breizh e 2021. Radio Kerne a ginnig deoc’h un heuliadenn gouestlet d’al lojeiz e Breizh, kaoz ‘vo deus ar statud a-annezad, deus taosoù war an eil-tiez, deus an dud ne gavont ket un ti ha deus an dud o deus prenet o zamm douar.

Ar statud a annezad e Breizh

Diaesoc’h diaesañ eo prenañ un ti e Breizh, muioc’h mui a dud a zo prest da brenañ tier kêr-ruz hag evit ar re gant nebeutoc’h a arc’hant ne chom ket kalz tiez da brenañ. Un hanterenn deus ar prennadennoù tiez e Breizh e 2020 a oa evit bevañ, an hanterenn ‘oa evit lakaat da vezañ feurmet. Pa oa an div drederenn eus ar brennerien Breizhiz, 20% a oa int o tont deus Enez Frañs. Er fin eo mat lâret ivez ez eus memes tra un drederenn deus an eil-tiez e Breizh perc’hennet gant Breizhiz. Met an dra-se ‘vo klevet er gaozeadenn ‘maomp o vont da selaou gant Nil Caouissin aterset gant Laetitia Fitamant. Nil Caouissin, kelenner war an istor-geografiezh hag ar brezhoneg ha mouezh aotret an UDB, n’eus skrivet Manifeste evit ar statud a annezad e Breizh. Displeg a raio deomp penaos e c’hell renkañ kudenn an diouer a diez evit an holl.

Pellgargañ

Priz al lojeiz

Er 5 bloaz tremenet eo kresket a 18% priz evit an tiez kozh e Breizh hag a 30% priz ar ranndioù kozh. Gwelet a reer ivez n’o deus ket an holl dañvez berc’hened ar memes budged. P’o deus ar re o prenañ er memes departamant ha ma vevent a-raok hag ar re o tont deus un departamant all ar memes sammad arc’hant da bostiñ tamm pe damm, ar re o tont deus Enez Frañs o doa 100 000 ¬ ouzhpenn ar re all da bostiñ en o zi pe ranndi nevez. Klevet hiniennoù o dez poan prenañ e Breizh er mare-mañ met ivez un dilennad hag ur c’heraozour o reiñ o soñj hag o ali war penaos e c’hell bezañ reolennet priz an tiez dre vras.

Pellgargañ

Bevañ gant tud all

Abaoe mizioù bremañ emañ Laetitia Fitamant o labourat war sujed al lojeiz e Breizh. C’hoant hon ‘noa lakaat war wel an diaesterioù a teu gant an diouer a diez da feurmiñ e kerioù zo, dreist ar reoù war an aod. Met a feur ma tastume testenioù an dud hon ‘neus merzhet e oa a-bouez ivez reiñ da glevet darempredoù an dud gant o lojeiz, o hent betek al lec’h int bet aterset, o c’hoantoù hag o huñvreoù. Er rann-mañ ‘maomp gant tud a zo o vevañ gant mignoned pe c’hoazh gant tud n’anevezent ket a-raok. Hag ar re bet aterset gant Laetitia war ar sujed-mañ a zo ivez ar re o deus graet deus o zi ul lec’h degemer pe c’hoazh ul lec’h sevenadurel.

Pellgargañ