Sikourit Radio Naoned

Radio Naoned, ur media e brezhoneg 100% el Liger Atlantel

C’hoar vihan Radio Kerne a vo ganet e deroù 2019

2 c’hoprad nevez

Ur studio e Yezhoù Ha Sevenadur

Ur gael programmoù urban ha yaouank

10 000 eurvezh labour, 500 litrad kafe

50e/sizhun a abadennoù e brezhoneg e diskouarn Anna Vreizh

Azasaat al lec’h ha prenañ an dafar studio : 50 000€

Produiñ ha skignañ an abadennoù : 100 000€ bep bloaz

An aozadurioù lec’hel a sikour par ma c’hellont met ezhomm zo ivez eus skoazell ar vretoned evit kas da benn ar raktres istorel-mañ.

Reiñ ur wezh pe reiñ ingal : ne vern, pep sikour a vo deuet mat !

Radio Naoned, brezhoneg er postoù el Liger-Atlantel

Kael program nevez evit Radio Kerne !

Fier omp da ginnig deoc’h hor c’hael programm nevez evit an distro skol 2018 !

Muioc’h a genlabourioù etre ar radio kevredigezhel e brezhoneg a vo, keleier deus pep lec’h e Breizh evitoc’h selaouerezed ha selaouerien ha lieuseurtoc’h an abadennoù.

Kinnig a reomp deoc’h neuze tri emgav pemdeziek war hor pevar radio :

 

7e30 – 9e : Pikous-Dibikous gant RKB ha RBG

1e – 2e : Trouz er gêr gant Arvorig FM

4e30 – 6e : Re Bell Ganti gant Radio Kerne

Ha derc’hel a reomp evel just gant hor programmoù made in Kerne (ha Naoned a-raok pell) ; div wech ar miz, Deomp dezhi, ur veaj bedagogel evit ar vrezhonegerien yaouank ha kozh, bep sizhun ar Blind test, 30mn abadenn fentus ha c’hoarzus gant skipailh ar radio, kronikennoù, atersadennoù, reportajoù fardet gant karantez bemdez ganeomp !

Emañ Radio Naoned o klask war e genurzhier.ez

Kinnig labour Radio Kerne / Radio Naoned
7 a viz c’hwevrer 2018

Kenurzhier-ez Radio Naoned

Pal ar post :
Krouiñ ha merañ ur radio e brezhoneg e Naoned

Misionoù :
Prientiñ ar staliañ RND e Naoned asambles gant skipailh Radio Kerne
Da heul :

  • kenurzhiañ ar radio nevez e Naoned (teknik, melestradur, kenlabourerien, kehentiñ…)
  • fardañ abadennoù radio, animañ atalieroù radio

Hierarkiezh :
An den vo dindan urzhioù kuzul merañ Radio Kerne dre Lou Millour ha Morgane Bramoullé, renerezed.
Karget vo an den da verañ da c’houde : tud en servij keodedel, tud a youl vat ha marteze implijidi all.

Perzhioù ispisial ar post :
Eurioù noz ha/pe dibenn-sizhun
Labour da gentañ e Ploneiz (un nebeut mizioù) ha da c’houde e Naoned

Barregezhioù goulennet :
Skiant prenet er sevel raktresoù
Gouzout merañ tud
Siriusted
Barrek tre war an aozañ
Barrek war an urzhiataerezh
En e/he aes gant an dud (bugale, tud deuet)
Brezhoneg brav
Intrudu
Bezañ emren (labour e/he unan)

Barregezhioù ouzhpenn deuet mat :
Gouzout eus micherioù ar radio
Spered kazetenniñ
Barrek war ar c’hehentiñ (meziantoù graferezh, community managing)

CDD 1 bloaz a c’hello dont da vezañ ur CDI
Post leun amzer. Gopr diwar gael ar « radiodiffusion ». Kregiñ : an abretañ posubl

CV ha lizher emginnig da gas da Lou Millour, lou@radiokerne.com a-raok an 2 a viz Ebrel

Bez ‘vo eus Radio Naoned ! Ur media e brezhoneg penn da benn e Naoned !

Un digoradur teknik dispar evit un araokadenn istorel evit ar yezh hag ar vro.

E miz Genver 2018 eo bet aotret Radio Kerne da zigeriñ ur radio e Naoned e DAB+ (Radio Niverel Douarel).

Ar radio yaouank-se a grogo gant ar skignañ e deroù 2019 war Veurgêr Naoned. Bodet ‘vo gant 12 radio all war ur multiplex.

Kinnig a raio programmoù boutin gant Radio Kerne met ivez abadennoù pemdeziek fardet war an dachenn evit ha gant Naonediz. Emaomp o labourat er mare mañ war staliañ ur studio e kalon ar veurgêr.

Met petra eo an DAB+ ?

DAB+ eo anv an norm skignañ dibabet evit ar Radio Niverel Douarel. Dianav a-grenn eo ar Radio Niverel Douarel e Breizh padal eo anavezet mat e darn eus ar broioù european lec’h vo lazhet an FM dizale evit chom gant an DAB+ hepken. Kevatal eo ouzh an TNT evit ar skinwel. Bro c’hall n’eus paket tost 15 vloaz dale war an danvez-mañ, met aze emañ ar raktres war an hent mat endro : embannet en deus ar CSA ur steuñv diorren broadel ken ac’hann da 2020.

Ur wagenn niverelaet ha kempreset eo an DAB+ hag a vo skignet gant ar radioioù en hertzian met war bandennoù frekañsoù disheñvel ouzh hini an FM.

Moaien vo kas titouroù ouzhpenn ar son war ar bandennoù-se : skeudennoù, skridoù ha videoioù..

Ret e vo d’an dud prenañ postoù radio nevez evit degemer an DAB+. Kavet vez ar postoù-se er stalioù dija. Postoù gant un degemer doubl : FM ha DAB+.